Rom 10 | BEF | STEP | Nalalu'nigitabe, nani bona'ni ya'ma Yuta bona'i enali kumu Hu'mau enubuto bilibe luto nolugo nipa'nigu nohibe. Nani enali kumu yabe luto Hu'mamofitoga buka tiba tiba nohube.

Romans 10

1 Nalalu'nigitabe, nani bona'ni ya'ma Yuta bona'i enali kumu Hu'mau enubuto bilibe luto nolugo nipa'nigu nohibe. Nani enali kumu yabe luto Hu'mamofitoga buka tiba tiba nohube. 2 Enali Hu'mamofitoga amuya melete bati huto nominone lite nehago bu goto lusiga nolube. Enali ya nehago aku'i Hu'mamofihi hapa'a keheli bati mehilata nehabe. 3 Enali Hu'mau bona'i le'mo bati huse hapa'a yamofihi mekeheli'ahabe. Enali enegekesa'ani keheli'ahanamofihi hapa'a mege'i nemalabe. Enali Hu'mau enele'mo bati huse hapa'a mekehelite aitoga agoya hu meemi'ahabe. 4 Hu'ma ho lifi'ehina bo, Kilisito, ai huto hu'ehigo keya ka mege'i molose'namu enele'mo bati hilina asu ho'ehibe. Ya su ho'ehinamu aitoga komopa'ani emite keheli amuya malago Hu'mau bona lamana'i enele'mo lolo hulata nohina yabe.

Hu'mau enubuto bise'namofihi ka

5 Bona'i moneuba keya kamofihi li pili kalina Hu'mamofihi bulo bona'i lamana'i hilinamu Moseu keya ka ma fayahi go'ehina:Keya ka mege'i malalina bouba minoba minoba huse'i lilina'mu yabe. 6 Aku'i kai Hu'mamofitoga keheli ule'ale huto komopaka emi'ahatalo kele'mo bati hilina'mu ma fayahi mono bukugu goto lu'ehina:Kai kiyi'afu kokulumagu tiloto lalitoga ka lamana'a hapa'a lito alibe luto melubo. To ana huto kiyi'afu keligu limiloto lalitoga ka lamana'a hapa'a lito alibe luto ya melubo,lite keye'ahana. To ya'ma fayahi hapa'a ma ni'ibe. Kai Yesu Kilisito kokulumagutifi, fili'ehinagatifi oto lehe'malina ya'ma sa sa mehubo. 8 Yesuhi mege'i molose'namofihi hapa'a ya huto meni'ibe. Ana fayahi ma luto mono bukugu nolibe:Ka hapa'a foto'i meni'ibe. Lebato'isi ni'ito komopakagu kabagakagu ni'ibe.To lali kagamu'i lu yege nohota ka yabe. 9 To lali mana lu yege nohone. Kai kabagakaguti Yesu nani kibina bo'ni nohibe luto lilata to Hu'mau fili'ehinagati le'mo ho ti'ehibe luto komopakagu ma'naka luto kehelilata nohatogo ai kele'mo bati hinogo minoba minoba hilane. 10 Lali Hu'mamofitoga keheli ule'ale hunogo komopatigu lele'mo bati hilibe. To lali labagatiguti Yesu kibina boti nohibe luto nolunogomo ai lele'menogo minoba minoba hilune. 11 Yanamofi kumu enali mono bukugu fayahi keye'ahana:Bona'i moneuba Hu'mamofitoga keheli ule'ale huto komopa'a emiloto lesa meluse hetofana huto minalibe. 12 Ya'ma fayahi keye'ahanamu yege yege boana'magihi keye'ahanamu, Yuta bona'i hiti to fegutoga bona'i hiti enali moneko nehanamo ni'ibe. Hu'mau ai enali li gehe meli'ehina. Ai yege yege bona'magihi kibina bo'ani moneko'isi nohuto'a aitoga kehe ilata nehanamagihi enele'moto lusa gi epalalina'mu yabe. 13 Ya'ma kagamu'i mono bukugu fayahi ge'ahanamo ni'ibe:Kibina bomofihi gi'a hoto lehe'mobo lite kehe ilata bona'magi asaga'i Hu'mau enele'mo bati hulenogo mino kosaba huse'i lilabe.

14 Ya lutomo ni'igo enali Hu'mamofitoga komopa'ani memele'ahana bona'magi hiya hite aitoga kehe ilabe? To enali kaga'a mekeheli'ahana bona'magi hiya hite aitoga keheli amuya malalabe? To bo moneuba ka lamana'a lu meepilenogo hiya hite ana kaga'a kehelilabe? 15 To Hu'mau kaga'a lu yege hose bona'i ho melifinogo kaga tili tele mehinogo kiyi'afu ana kaga lu enelepilibe? Yana'mu mono bukugu fayahi ge'ahanamo ni'ibe:Enali kapo melete hekili hekili hite hetofa kaga'a lite neana bona'magihi enigigusalo soso hu epoloto gepohi lilune. 16 Aku'i bona'i mone'amagi ana ka lamana'aloga kehelite mege'i memele'ahabe. Koyapa Hu'mamofihi kaga lu yege hose bo, Aisaiyau, ai fayahi mone koyo'ehina:Kibina bo'nio. Hetofa kagaka lu epi'ohutaya kiyi'agihi kiyi'agihi ma'naka lite ya'ma kehelite mege'i mele'ahabe? 17 To ya huto ni'igo bona'magi Kilisito kumu hetofa kaga lu yege hago keheli'ohune. To ana kaga keheliloto Hu'mamofitoga agoya hu emilata nohune.

18 To nani mone koloka halube. Ya'ma Yuta bona'magi Hu'mamofihi ka'a keheli'ahana meni'ifihe? O'e, enali akeheli'ahana yabe. Mono bukugu ma fayahi ge'ahana:

Lu yege hose bona'mofihi nogo'ani
asaga melugu hepatoga bula ola higo,
boana'magi keheli'ahana.
To ya'ma mono kaga'ani biba biba nohigo,
silaga kapoluga
boana'magi keheli'ahana yabe.

19 To nani mone hiti koloka halube. Yuta bona'magi ka lamana'a mekeheli'ahana ni'ifihe? Ya huto meni'ibe. Keheli'ahana yabe. Hu'mau koyapa'i enali kaga'a mege'i memele'ahana kumu kohe toto Mosehi bukugu lu'ehina ka'a fayahi koyo'ehina:

Nani fato melugu boana'magihi
enigi'ani meni'ina
enele'moto hulenogo
lenali bu gelete siko hilabe.
To noto noto bona'i
ka keheli sibina hi'ahanamagihi
nani enele'mo bati nohinogo'nimo,
lenali kehelite lenipagu logo bilibe.

20 To Aisaiyau amuya moloto Hu'mamofihi lu'ehina ka'amu ma luto koyo'ehina:

Nani kumu sa sa mehi'ahana bona'magi
nehanalo bu nehetugo
enali be nege'ahana.
Nanitoga kehe mei'ahanamagi
enubulo huto hugo keheli'ahana yabe.

21 Ya hu'ehina'mu Hu'mau Isilaeli bona'magi kumu ka mone hiti lu'ehina ma ni'ibe:Nani asaga yupahi enele'malube luto nayatu babeyafa nohugo aku'i enali ka keheli he'mite to komopa'ani nunu gina boana'i nanitoga mealune'mu nehabe.